Muqdisho | March 30, 2023 – Dowladda federaalka Soomaaliya ayaa si adag uga jawaabtay hadalkii dhawaan kasoo yeeray Afhayeenka kooxda Al-Shabaab Cali Dheere, kaasi oo uu ku sheegay in uu fashilmay wejiga koowaad ee dagaalka ka dhanka ah.
Cali Dheere oo wareysi gaar ah siiyay warbaahinta ku hadashay afka kooxda ayaa waxa uu sheegay inuu fashilmay wejiga koowaad oo uu sheegay inay qeyb ka ahaayeen dowladaha NATO, gaar ahaan Turkey iyo Mareykanka, sidaas darteedna hadda dalka la keenayo ciidamo Itoobiyaan ah.
“Xamlada wajigeedii hore markuu fashilmay ciidamadii uu soo tababaray wax tari waayeen wuxuu qaatay Mareykanka in uu Itoobiya dib usoo celiyo, marka wajiga 2-aad ee hadda la sheegayo cidda lagu tashanayaahi oo la rabo in dalka lagu soo celiyo waa Itoobiya,” ayuu yiri.
La-taliyaha Amniga Qaranka ee Ra’iisul Wasaaraha Soomaaliya Kamaal Guutaale oo la hadlay VOA ayaa beeniyay sheegashada Cali Dheere, isaga oo sheegay in wejiga koowaad ee dagaalka laga gaaray guulo wax ku ool ah.
“Macnaha fashil waa in loogu noqdaa haddii xoreynta Shabeellaha Dhexe, Hiiraan, Koonfurta Mudug iyo qeybo kamid ah Galgaduud ay fashil tahay. Shacabka Soomaaliyeed iyo dowladooda waxay suurta-galiyeen dhamaan guulahaas ay gaareen ciidamadeenna amaanku muddo aad u yar,” ayuu yiri Kamaal Daahir Xasan Guutaale.
La-taliyaha Amniga Qaranka ee Ra’iisul Wasaare Xamza ayaa sidoo kale waxa uu tilmaamay in hadalka kasoo yeeray Afhayeenka Al-Shabaab Cali Dheere ee ahaa in Mareykanka uu soo abaabulay duulaaka Soomaaliya “ay tahay mid aan waxba ka jirin.”
Sidoo kale waxa uu sheegay in kooxda Al-Shabaab ay la dagaalamayaan dhalinyaro askar ah oo Soomaaliyeed oo si wanaagsan u tababaran, dagaalkana yaqaan, “Waxay Al-Shabaab ka xoreeyeen in ka badan 500KM, welina way ku daba jiraan,” ayuu yiri Kamaal Daahuir Xasan Guutaale.
Guutaale ayaa ugu dambeyntiina waxa uu sheegay in dhamaan waddamada safka hore ee qaybta ka ah howl-galka Midowga Afrika ee ATMIS ay oggolaansho u haystaan inay ka qeyb-qaataan howl-gallada lagu soo celinayo nabadda Soomaaliya, ayna dowladda ka caawinayaan sidii looga guulaysan lahaa kooxda, loona soo afjari lahaa.
__________________________________________________________________
Qaranimo Online
_____________________________________________________________________________________Xafiiska Wararka Qaranimo Online | Mogadishu, Somalia
_____________________________________________________________________________________Advertisement
_____________________________________________________________________________________
|
|
|
|
