Mareykanka oo dhinacdyada Itoobiya ugu baaqay inay si degdeg ah u joojiyaan dagaalka sokeeye

____________________________________________________________________________

Sabti: OCTOBER 15, 2022

Xoghayaha arrimaha dibadda ee Maraykanka Antony Blinken ayaa bayaan uu soo saaray fiidnimadii Jimcaha ku celiyay mowqifka Maraykanka, isagoo sheegay inay uu aad uga walaacsan yahay rabshadaha ka socda waqooyiga Itoobiya, gaar ahaan “Bartilmaameedka aan kala sooc lahayn ee lagu beegsado dadka rayidka ah”.

“Waxaan ku celinaynaa in dowladda Itoobiya iyo mas’uuliyiinta gobolka Tigray ay si deg-deg ah u joojiyaan dhammaan colaadaha oo ay si dhab ah uga qayb galaan wadahadallada nabadeed ee uu hoggaaminayo Midowga Afrika ee soo socda,” ayuu yiri Blinken.

Ergeyga gaarka ah ee Maraykanka u qaabbilsan Geeska Africa Mike Hammer ayaa Jimcihii ku sugnaa magaalada Addis Ababa, booqashadaas oo qayb ka ah dadaallo lagu doonayo in lagu soo afjaro dagaalka socday ku dhawaad laba sano ee u dhexeeyay ciidamada Itoobiya iyo xoogagga Tigreega.

Quwadaha reer galbeedka oo uu ku jiro Mareykanka ayaa Arbacadii ku boorriyay dowladda Itoobiya iyo Jabhadda Xoreynta Shacabka Tigray (TPLF) in ay billaabaan wadahadallo nabadeed oo uu hoggaaminayo Midowga Afrika, waxayna ugu baaqeen dalka deriska ah ee Eritrea in ay ciidamadeeda kala baxdo goobta dagaalka.

Hammer ayaa wadahadal kula yeeshay Addis Ra’iisul Wasaare ku xigeenka ahna Wasiirka Arrimaha Dibadda Demeke Mekonnen, kaasoo “dib u xaqiijiyay sida ay dowladda uga go’an tahay in si nabad ah lagu xalliyo colaadda ka aloosan waqooyiga dalka,” ayay wasaaradda arrimaha dibadda Itoobiya ku soo qortay barteeda twitter-ka.

Xukuumadda Ra’iisul Wasaare Abiy Ahmed iyo maamulka Tigrayga labaduba waxay aqbaleen martiqaad ay Midowga Afrika u fidiyeen si ay u soo fariistaan miiska wadahadalka.

Balse wadahadallo lagu waday in todobaadkii hore ay ka bilowdaan Koonfur Afrika ayaa guuldarreystay, iyadoo dublamaasiyiintu ay soo jeediyeen in arrimaha qabanqaabada iyo ay qayb ka yihiin eedda.

Hammer ayaa sheeegay in dib ugu soo noqoshada ciidamada Eritrea ee Itoobiya ay si weyn uga sii dartay xaaladda.

AFP.

Office Nairobi Kenya

_____________________________________________________________________________________