Khamiis: OCTOBER 13, 2022
Sacuudia Carabiya ayaa diiday kuna sheegtay “wax aan xaqiiqda ku saleysneyn” dhalleeceynta ka dhanka ah go’aankii uu toddobaadkii tegay qaatay ururka OPEC+ ee uu ku dhimayo wax soo-saarka saliidda, xilli Mareykanka uu aad uga soo horjeedo.
Sacuudi Carabiya waxa sheegtay in codsiga Mareykanka uu ahaa in go’aanka dib loo dhigo hal bil kaliya, uuna yeelan lahaa cawaaqib dhaqaale oo taban.
Go’aanka OPEC+ waxaa lagu qaatay si heshiis ah ayada oo lagu xisaabtamayo isu-dheeli tirka soo-saarka iyo dalabka, waxaana looga dan lahaa in lagu xakameeyo xasillooni darrada suuqa, waxaa sidaas bayaan ay maanta soo saartay ku tiri wasaaradda arrimaha dibedda Sacuudiga.
Madaxweyne Joe Biden ayaa Talaadadii wacad ku maray “Inuu jiri doono cawaaqib” ku yimaada xiriirka Mareykanka iyo Sacuudiga kadib go’aankii OPEC+ ee toddobaadkii ay qaateen ayaga oo ku gacan sayray diidmada Mareykanka.
Kooxda OPEC+ oo ka kooban dalalka shidaalka dhoofiya iyo Russia ayaa toddobaadkii tegay ku dhowaaqay inay dhimayaan bartilmaameedkooda wax soo-saar kadib toddobaadyo uu Mareykanka waday qalqaalo ah inaysan sidaas sameyn.
Dhimista OPEC+ ayaa Washington ka buurtay walaac ku saabsan suurta-galnimada ah inuu sare u kaco qiimaha shidaalka kahor doorashada dhexe ee November, taasi oo Dimoqraadiga ay isku dayayaan inay sii xajistaan maamulka Aqalka Wakiilada iyo kan Senate-ka.
Wasaaradda arrimaha dibedda Sacuudiga ayaa maanta xustay wadatashiyo ay la yeelatay Mareykanka kahor kulankii OPEC+ ee 5-tii October, taasi oo lagu weydiistay inay dhimista dib u dhigto muddo bil ah.
“Boqortooyadu waxay caddaysay iyada oo la tashanaysa maamulka Maraykanka in dhammaan falanqaymaha dhaqaale ay muujinayaan in dib u dhigista go’aanka OPEC + muddo bil ah, sida lasoo jeediyey, ay yeelan lahayd cawaaqib dhaqaale oo taban,” ayaa lagu yiri bayaanka wasaaradda arrimaha dibadda ee Sucuudiga.
Mareykanka ayaa ku eedeeyey Sacuudi Carabiya inay isu dhiibtay Ruushka oo kasoo horjeeda in dalalka Reer Galbeedka ay xaddidaan qiimaha shidaalka Ruushka ayaga oo uga jawaabaya duulaanka ay Moscow ku qaaday Ukraine.
Bayaanka wasaaradda arrimaha dibedda Sacuudiga, oo soo xiganaya sarkaal aan la magacaabin, ayaa adkeeyey in dhimista “ay sii buuxdo ugu saleysneyd dhaqaale.”
Waxaa sidoo kale lagu sheegay in boqortooyada ay u aragto xiriirkeeda Mareykanka mid “Istaraatiji ah” waxayna xoojisay muhiimadda ay leedahay in la is-ixtiraamo.
Golaha Iskaashiga Khaliijka ayaa sidoo kale soo saaray bayaan uu ku taageerayo hadalka Sacuudiga, wuxuuna amaanay dadaallada boqortooyada ay suuqa uga ilaalineyso qalalaase.
REUTERS
Office Nairobi Kenya
_____________________________________________________________________________________Xafiiska Wararka Qaranimo Online | Mogadishu, Somalia
_____________________________________________________________________________________Advertisement
_____________________________________________________________________________________
|
|
|
|
